ಅಹಮದಾಬಾದ್: ಅಹಮದಾಬಾದ್ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ಭಾನುವಾರ (ಮೇ 31) ನಡೆದ ಐಪಿಎಲ್ ಫೈನಲ್ ಹಣಾಹಣಿಯಲ್ಲಿ ಗುಜರಾತ್ ಟೈಟನ್ಸ್ ತಂಡವನ್ನು 5 ವಿಕೆಟ್ಗಳಿಂದ ಮಣಿಸಿದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ತಂಡ ಸತತ ಎರಡನೇ ಬಾರಿಗೆ ಇಂಡಿಯನ್ ಪ್ರೀಮಿಯರ್ ಲೀಗ್ (IPL 2026) ಟ್ರೋಫಿಯನ್ನು ಮುಡಿಗೇರಿಸಿಕೊಂಡಿದೆ.
ಕಳೆದ 2025ರ ಸೀಸನ್ನಲ್ಲಿ 17 ವರ್ಷಗಳ ಸುದೀರ್ಘ ಕಾಯುವಿಕೆಗೆ ಬ್ರೇಕ್ ಹಾಕಿ ಚೊಚ್ಚಲ ಕಪ್ ಗೆದ್ದಿದ್ದ ಆರ್ಸಿಬಿ, ಈ ಬಾರಿ ರಜತ್ ಪಾಟಿದಾರ್ ನಾಯಕತ್ವದಲ್ಲಿ ಸತತ ಎರಡನೇ ಬಾರಿ ಚಾಂಪಿಯನ್ ಪಟ್ಟ ಅಲಂಕರಿಸಿದ ಮೂರನೇ ತಂಡ ಎಂಬ ಐತಿಹಾಸಿಕ ದಾಖಲೆ ಬರೆಯಿತು. ಟೂರ್ನಿಯಲ್ಲಿ ಚಾಂಪಿಯನ್ ಆದ ಆರ್ಸಿಬಿಗೆ 20 ಕೋಟಿ ರೂ. ಹಾಗೂ ರನ್ನರ್ ಅಪ್ ಆದ ಶುಭಮನ್ ಗಿಲ್ ನೇತೃತ್ವದ ಗುಜರಾತ್ ಟೈಟನ್ಸ್ ತಂಡಕ್ಕೆ 13 ಕೋಟಿ ರೂ. ನಗದು ಬಹುಮಾನ ನೀಡಲಾಯಿತು.
ಫೈನಲ್ನಲ್ಲಿ ಕೊಹ್ಲಿ ಅಬ್ಬರ:
ಗುಜರಾತ್ ಟೈಟನ್ಸ್ ನೀಡಿದ್ದ 156 ರನ್ಗಳ ಸಾಧಾರಣ ಗುರಿಯನ್ನು ಬೆನ್ನಟ್ಟಿದ ಆರ್ಸಿಬಿ ಪರ ರನ್ ಮಷಿನ್ ವಿರಾಟ್ ಕೊಹ್ಲಿ ಸಮಯೋಚಿತ ಬ್ಯಾಟಿಂಗ್ ನಡೆಸಿ 75 ರನ್ ಸಿಡಿಸುವ ಮೂಲಕ ತಂಡದ ಗೆಲುವಿನಲ್ಲಿ ನಿರ್ಣಾಯಕ ಪಾತ್ರ ವಹಿಸಿದರು. ಬೌಲರ್ಗಳ ಸಂಘಟಿತ ಪ್ರದರ್ಶನ ಆರ್ಸಿಬಿ ಸತತ ಎರಡನೇ ಬಾರಿ ಟ್ರೋಫಿ ಎತ್ತಿಹಿಡಿಯಲು ನೆರವಾಯಿತು.
ಪ್ರಶಸ್ತಿಗಳ ಬೇಟೆಯಾಡಿದ 15ರ ಹರೆಯದ ವೈಭವ್ ಸೂರ್ಯವಂಶಿ!
ಈ ಬಾರಿಯ ಐಪಿಎಲ್ ಸೀಸನ್ನಲ್ಲಿ ರಾಜಸ್ಥಾನ್ ರಾಯಲ್ಸ್ (RR) ತಂಡದ ಪರ ಆಡಿ, ವಿಶ್ವದರ್ಜೆಯ ಬೌಲರ್ಗಳಿಗೆ ನಡುಕ ಹುಟ್ಟಿಸಿದ್ದ 15 ವರ್ಷದ ಯುವ ಆಟಗಾರ ವೈಭವ್ ಸೂರ್ಯವಂಶಿ ಪ್ರಶಸ್ತಿಗಳ ಬೇಟೆಯಾಡಿದ್ದಾರೆ. ಭಾನುವಾರದ ಫೈನಲ್ ಪಂದ್ಯವನ್ನು ಐಸಿಸಿ ಅಧ್ಯಕ್ಷ ಜಯ್ ಶಾ ಅವರೊಂದಿಗೆ ಕುಳಿತು ವೀಕ್ಷಿಸಿದ್ದ ಸೂರ್ಯವಂಶಿ, ಒಟ್ಟು 5 ಪ್ರಮುಖ ಪ್ರಶಸ್ತಿಗಳನ್ನು ತಮ್ಮದಾಗಿಸಿಕೊಂಡಿದ್ದಾರೆ.
776 ರನ್ ಸಿಡಿಸುವ ಮೂಲಕ ಅತ್ಯಂತ ಕಿರಿಯ ವಯಸ್ಸಿನಲ್ಲಿ ‘ಆರೆಂಜ್ ಕ್ಯಾಪ್’ ಗೆದ್ದ ದಾಖಲೆ ಬರೆದ ವೈಭವ್, ಇದರೊಂದಿಗೆ ಟೂರ್ನಿಯ ಅತ್ಯಂತ ಮೌಲ್ಯಯುತ ಆಟಗಾರ (MVP), ಉದಯೋನ್ಮುಖ ಆಟಗಾರ, ಅತ್ಯುತ್ತಮ ಸ್ಟ್ರೈಕ್ ರೇಟ್ ಮತ್ತು ಟೂರ್ನಿಯಲ್ಲಿ ಅತಿ ಹೆಚ್ಚು ಸಿಕ್ಸರ್ ಸಿಡಿಸಿದ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
ಇನ್ನೊಂದೆಡೆ, ಗುಜರಾತ್ ಟೈಟನ್ಸ್ ತಂಡದ ಹಿರಿಯ ವೇಗಿ ಕಗಿಸೊ ರಬಾಡ 29 ವಿಕೆಟ್ ಕಬಳಿಸಿ ‘ಪರ್ಪಲ್ ಕ್ಯಾಪ್’ ಪಡೆದರೆ, ಅದೇ ತಂಡದ ಮೊಹಮ್ಮದ್ ಸಿರಾಜ್ ಅತಿ ಹೆಚ್ಚು ಡಾಟ್ ಬಾಲ್ ಎಸೆದ ಪ್ರಶಸ್ತಿ ಪಡೆದರು.
ಐಪಿಎಲ್ 2026ರ ಪ್ರಶಸ್ತಿ ವಿಜೇತರ ಸಂಪೂರ್ಣ ವಿವರ:
ಚಾಂಪಿಯನ್ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) 20 ಕೋಟಿ ರೂ. ಬಹುಮಾನ
ರನ್ನರ್ ಅಪ್ ಗುಜರಾತ್ ಟೈಟನ್ಸ್ (GT) 13 ಕೋಟಿ ರೂ. ಬಹುಮಾನ
ಆರೆಂಜ್ ಕ್ಯಾಪ್ (ಅತಿ ಹೆಚ್ಚು ರನ್) ವೈಭವ್ ಸೂರ್ಯವಂಶಿ (RR) 776 ರನ್ಗಳು
ಪರ್ಪಲ್ ಕ್ಯಾಪ್ (ಅತಿ ಹೆಚ್ಚು ವಿಕೆಟ್) ಕಗಿಸೊ ರಬಾಡ (GT) 29 ವಿಕೆಟ್ಗಳು
ಅತ್ಯಂತ ಮೌಲ್ಯಯುತ ಆಟಗಾರ (MVP) ವೈಭವ್ ಸೂರ್ಯವಂಶಿ (RR) –
ಉದಯೋನ್ಮುಖ ಆಟಗಾರ (Emerging Player) ವೈಭವ್ ಸೂರ್ಯವಂಶಿ (RR) –
ಅತ್ಯಧಿಕ ಸಿಕ್ಸರ್ಗಳು ವೈಭವ್ ಸೂರ್ಯವಂಶಿ (RR) 71 ಸಿಕ್ಸರ್ಗಳು
ಅತ್ಯಧಿಕ ಬೌಂಡರಿಗಳು ಸಾಯಿ ಸುದರ್ಶನ್ (GT) 75 ಬೌಂಡರಿಗಳು
ಅತ್ಯುತ್ತಮ ಸ್ಟ್ರೈಕ್ ರೇಟ್ ವೈಭವ್ ಸೂರ್ಯವಂಶಿ (RR) 237.31 ಸ್ಟ್ರೈಕ್ ರೇಟ್
ಅತ್ಯಧಿಕ ಡಾಟ್ ಬಾಲ್ಗಳು ಮೊಹಮ್ಮದ್ ಸಿರಾಜ್ (GT) 172 ಡಾಟ್ ಬಾಲ್ಗಳು
ಅತ್ಯುತ್ತಮ ಕ್ಯಾಚ್ ಮನೀಶ್ ಪಾಂಡೆ (KKR) –
ಫೇರ್ ಪ್ಲೇ ಪ್ರಶಸ್ತಿ ಪಂಜಾಬ್ ಕಿಂಗ್ಸ್ –
ಅತ್ಯುತ್ತಮ ಪಿಚ್ ಮತ್ತು ಗ್ರೌಂಡ್ಸ್ (4 ಕ್ಕಿಂತ ಕಡಿಮೆ ಪಂದ್ಯ) ಹಿಮಾಚಲ ಪ್ರದೇಶ ಕ್ರಿಕೆಟ್ ಅಸೋಸಿಯೇಷನ್ –
ಅತ್ಯುತ್ತಮ ಪಿಚ್ ಮತ್ತು ಗ್ರೌಂಡ್ಸ್ (ಹೆಚ್ಚಿನ ಪಂದ್ಯಗಳು) ಬಂಗಾಳ ಕ್ರಿಕೆಟ್ ಅಸೋಸಿಯೇಷನ್
