ಕಾಪು: ಉಡುಪಿ ಜಿಲ್ಲೆಯ ಕಾಪು ಸಮೀಪ ವ್ಯಕ್ತಿಯೋರ್ವರ ಮನೆಯಲ್ಲಿ ಯಾರು ಇಲ್ಲದ ವೇಳೆಯಲ್ಲಿ ಕಳ್ಳರು ನುಗ್ಗಿ ಲಕ್ಷಾಂತರ ರೂಪಾಯಿ ಚಿನ್ನದ ಹಾಗೂ ಬೆಳ್ಳಿಯ ವಸ್ತುಗಳನ್ನು ಕಳ್ಳತನ ನಡೆಸಿದ ಘಟನೆ ಸಂಭವಿಸಿದೆ.
ರಾಘವೇಂದ್ರ ಕಿಣಿ ಎಂಬವರ ಮನೆಯಲ್ಲಿ ಕಳ್ಳತನವಾಗಿದೆ.
ಕಾಪು ಪೊಲೀಸ್ ಠಾಣೆಯಲ್ಲಿ ಕಳ್ಳತನ ಪ್ರಕರಣದ ದಾಖಲಾಗಿದೆ. ಪೊಲೀಸರು ತನಿಖೆ ಕಾರ್ಯ ನಡೆಸುತ್ತಿದ್ದಾರೆ.
ಪ್ರಕರಣದ ವಿವರ : ಪಿರ್ಯಾದುದಾರ ರಾಘವೇಂದ್ರ ಕಿಣಿ, ಪ್ರಾಯ: 46ವರ್ಷ, ತಂದೆ: ದಿ. ಸುಭಾಷ್ ಕಿಣಿ, ವಿಳಾಸ: ಮನೆ ನಂ: 1-37 “ರಾಮನಾಥ ಕೃಪಾ”, ಮಲ್ಲಾರು ಗ್ರಾಮ ಇವರು ಕಾಪು ತಾಲೂಕು ಪಾದೂರಿನಲ್ಲಿರುವ ISRPL ನಲ್ಲಿ ಹೌಸ್ ಕೀಪರ್ ಕೆಲಸ ಮಾಡಿಕೊಂಡಿದ್ದು, ಎಂದಿನಂತೆ ದಿನಾಂಕ: 04.12.2025 ರಂದು ಬೆಳಿಗ್ಗೆ ಕೆಲಸಕ್ಕೆ ಹೋಗುವ ಸಮಯದಲ್ಲಿ ತಾಯಿಯವರನ್ನು ತಮ್ಮ ಅಕ್ಕನ ಮನೆಯಲ್ಲಿ ಬಿಟ್ಟು ಕೆಲಸಕ್ಕೆ ಹೋಗಿದ್ದು, ನಂತರ ಪಿರ್ಯಾದುದಾರರ ಪತ್ನಿ ಮಕ್ಕಳ ಶಾಲಾ ವಾರ್ಷಕೋತ್ಸವ ಕಾರ್ಯಕ್ರಮಕ್ಕೆ ಹೋಗುವ ಸಲುವಾಗಿ ಬೆಳಿಗ್ಗೆ 9.45 ಗಂಟೆಗೆ ಮನೆಯನ್ನು ಹೊರಗಿನಿಂದ ಬೀಗ ಹಾಕಿ ಕೀ ಯನ್ನು ಮನೆಯ ವಿದ್ಯತ್ ಮೀಟರ್ ನ ಬಾಕ್ಸ್ ನಲ್ಲಿ ಇರಿಸಿ ಹೋಗಿರುತ್ತಾರೆ. ಇದೇ ಸಂದರ್ಭದಲ್ಲಿ ಬೆಳಿಗ್ಗೆ 9.45 ಗಂಟೆಯಿಂದ ಮಧ್ಯಾಹ್ನ 1.10 ಗಂಟೆಯ ಮಧ್ಯಾವಧಿಯಲ್ಲಿ ಯಾರೋ ಕಳ್ಳರು ಪಿರ್ಯಾದುದಾರರು ಮನೆಯ ವಿದ್ಯತ್ ಮೀಟರ್ ನ ಬಾಕ್ಸ್ ನಲ್ಲಿ ಇರಿಸಿದ್ದ ಕೀ ಇಂದ ಮನೆಯ ಎದುರಿನ ಬಾಗಿಲನ್ನು ತೆರೆದು ಒಳಗಿನಿಂದ ಲಾಕ್ ಮಾಡಿಕೊಂಡು ಮನೆಯ ಬೆಡ್ ರೂಂನ ಕಪಾಟಿನಲ್ಲಿದ್ದ 1) ಸುಮಾರು 28 ಗ್ರಾಂ ತೂಕದ (1,40,000/- ಮೌಲ್ಯದ) ಕಾಶಿ ತಾಳಿ ಇರುವ ಹವಳದ ಸರ-1, 2) ಸುಮಾರು 8 ಗ್ರಾಂ ತೂಕದ (40,000/- ಮೌಲ್ಯದ) ಹವಳ ಇರುವ ಚಿನ್ನದ ಚೈನ್-1, 3) ಸುಮಾರು 10 ಗ್ರಾಂ ತೂಕದ (50,000/- ಮೌಲ್ಯದ) ಚಿನ್ನದ ಚೈನ್-1, 4) ಸುಮಾರು 8 ಗ್ರಾಂ ತೂಕದ (40,000/- ಮೌಲ್ಯದ) ಕಿವಿಯೋಲೆ-1 ಜೊತೆ, 5) ಸುಮಾರು 8 ಗ್ರಾಂ ತೂಕದ (40,000/- ಮೌಲ್ಯದ) ದೊಡ್ಡವರ ಉಂಗುರ-1 ಮತ್ತು ಚಿಕ್ಕ ಮಕ್ಕಳ ಉಂಗುರ-2 ಒಟ್ಟು 3 ಉಂಗುರ, 6) ಸುಮಾರು 8 ಗ್ರಾಂ ತೂಕದ 40,000/- ಕಿವಿಯ ಜುಮುಕಿ ಮತ್ತು ಬೆಂಡೋಲೆ- 1ಜೊತೆ, 7) ಕೆಂಪು ಬಣ್ಣದ ದಾರದಿಂದ ಹೆಣೆದಿರುವ ಚಿನ್ನದ ಗುಂಡುಗಳಿರುವ ಸುಮಾರು 8ಗ್ರಾಂ ತೂಕದ (40,000/- ಮೌಲ್ಯದ) ಕೂರ್ಗಿಸ್ ಚೈನ್-1, 8) ಗೋದ್ರೇಜ್ ನ ಕ್ಯಾಶ್ ಡ್ರಾವರ್ ನಲ್ಲಿಟ್ಟಿದ್ದ ಅರಿಶಿಣ-ಕುಂಕುಮ ಹಾಕುವ 500/- ರೂ ಮೌಲ್ಯದ ಬೆಳ್ಳಿಯ ಬಟ್ಟಲು-1, 9) ಸುಮಾರು 1,000/- ರೂ ಮೌಲ್ಯದ ಚಿಕ್ಕ ಬೆಳ್ಳಿ ದೀಪಗಳು-2. ಹೀಗೆ ಒಟ್ಟು ರೂಪಾಯಿ 3,90,000/- (ಮೂರು ಲಕ್ಷ ತೊಂಭತ್ತು ಸಾವಿರ ರೂಪಾಯಿ) ಮೌಲ್ಯದ ಸುಮಾರು 72 ಗ್ರಾಂ ತೂಕದ ಚಿನ್ನದ ಒಡವೆಗಳು ಹಾಗೂ ಸುಮಾರು 1,500/- ಮೌಲ್ಯದ ಬೆಳ್ಳಿ ವಸ್ತುಗಳನ್ನು ಕಳವು ಮಾಡಿಕೊಂಡು ಹೋಗಿರುತ್ತಾರೆ.
ಈ ಬಗ್ಗೆ ಕಾಪು ಪೊಲೀಸ್ ಠಾಣೆ ಅಪರಾಧ ಕ್ರಮಾಂಕ : 156-2025 ಕಲಂ: 331(3), 305, BNS ರಂತೆ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ.
