ಶ್ರೀಕ್ಷೇತ್ರ ಪೊಳಲಿಯ ರಾಜರಾಜೇಶ್ವರಿಯ ಸನ್ನಿಧಿಯಲ್ಲಿ ದಶಕಗಳ ಕಾಲ ಮಂತ್ರಘೋಷಗಳನ್ನು ಮೊಳಗಿಸುತ್ತಾ, ದೇವಿಯ ಪೂಜಾ ಕೈಂಕರ್ಯಗಳಲ್ಲಿ ತಮ್ಮ ಬದುಕನ್ನೇ ಸಮರ್ಪಿಸಿಕೊಂಡಿದ್ದ ಹಿರಿಯ ಪ್ರಧಾನ ಅರ್ಚಕ ಪೊಳಲಿ ನಾರಾಯಣ ಭಟ್ (78) ದೈವಾಧೀನರಾಗಿದ್ದಾರೆ.
ಆ ಮೂಲಕ ಪೊಳಲಿ ಕ್ಷೇತ್ರದ ಧಾರ್ಮಿಕ ಇತಿಹಾಸದ ಒಂದು ಸುವರ್ಣ ಅಧ್ಯಾಯ ಅಂತ್ಯಗೊಂಡಂತಾಗಿದೆ.
ಜಾತ್ರೆ ನಿಗದಿಯಾದ ಮರುದಿನವೇ ದೇವಿಯ ಸನ್ನಿಧಿಗೆ ಪಯಣ!
, ನಿನ್ನೆಯಷ್ಟೇ ಪೊಳಲಿಯ ಭವ್ಯ ಜಾತ್ರೋತ್ಸವಕ್ಕೆ ದಿನ ನಿಗದಿಯಾಗಿತ್ತು. ಕ್ಷೇತ್ರದ ಸಂಭ್ರಮಕ್ಕೆ ಸಿದ್ಧತೆಗಳು ಶುರುವಾಗುತ್ತಿದ್ದಂತೆಯೇ, ಇಡೀ ಪೂಜಾ ವಿಧಿವಿಧಾನಗಳನ್ನು ಮುನ್ನಡೆಸಬೇಕಿದ್ದ ಹಿರಿಯ ಚೇತನವೇ ಅಸ್ತಂಗತವಾಗಿರುವುದು ನೋವು ತಂದಿದೆ.
ದೇವಿಯ ಸನ್ನಿಧಿಯಲ್ಲಿ ಹೂವು-ಗಂಧದ ಪರಿಮಳದಂತೆ ಬದುಕಿದವರು, ಈಗ ದೇವಿಯ ಪಾದವನ್ನೇ ಸೇರಿದ್ದಾರೆ.
ಐದು ದಶಕಗಳ ನಿಷ್ಠಾವಂತ ಸೇವೆ
ಕಳೆದ 50 ವರ್ಷಗಳಿಗೂ ಹೆಚ್ಚು ಕಾಲ ಅತ್ಯಂತ ಭಕ್ತಿ ಮತ್ತು ನಿಷ್ಠೆಯಿಂದ ರಾಜರಾಜೇಶ್ವರಿಯ ಸೇವೆ ಸಲ್ಲಿಸಿದವರು ನಾರಾಯಣ ಭಟ್.
ಇವರ ಕೈಯಿಂದ ತೀರ್ಥ-ಪ್ರಸಾದ ಸ್ವೀಕರಿಸಿದ ಸಾವಿರಾರು ಭಕ್ತರಿಗೆ ಇವರು ಕೇವಲ ಅರ್ಚಕರಲ್ಲ, ಬದಲಾಗಿ ಒಬ್ಬ ಹಿರಿಯ ಮಾರ್ಗದರ್ಶಕರೂ ಆಗಿದ್ದರು. ಅವರ ಮೃದು ಸ್ವಭಾವ ಹಾಗೂ ಶಾಂತ ವ್ಯಕ್ತಿತ್ವ ಪೊಳಲಿ ಕ್ಷೇತ್ರಕ್ಕೆ ಬರುವ ಪ್ರತಿಯೊಬ್ಬರಿಗೂ ನೆಮ್ಮದಿ ನೀಡುತ್ತಿತ್ತು.
